-:( मंजूर नाही ):-

गझल 

बोल माझ्या पापण्यांचे का तुला मंजूर नाही ? 

वाहणे या आसवांचे का तुला मंजूर नाही ?? 

सोबतीला चंद्र नाही , रात्र आहे जीवघेणी ; 

जागणे हे चांदण्यांचे का तुला मंजूर नाही ? 

चांगली गंधाळलेली बाग आहे त्या फुलांची ; 

लाजणे छोट्या कळ्यांचे का तुला मंजूर नाही ? 

सोड आता , फार झाले ना बहाने टाळण्याचे ; 

भाळणे या आठवांचे का तुला मंजूर नाही ?? 

अंत झाला जीवनाचा मी जरी नाही जगी त्या ; 

भास माझे भासण्याचे का तुला मंजूर नाही ?? 

कविकुमार - 

(१८।२।१४)