-:( मराठी ):-

आस मराठी 

ध्यास मराठी ! 

या हृदयाचा ; 

श्वास मराठी !! 

मान मराठी 

जान मराठी ! 

या जगण्याची 

शान मराठी !! 

बात मराठी 

मात मराठी ! 

दिव्यात लावू 

वात मराठी !! 

ठाव मराठी 

भाव मराठी ! 

समृद्धिचे 

नाव मराठी !! 

कविकुमार - 

(२६।२।१४)

-:( मंजूर नाही ):-

गझल 

बोल माझ्या पापण्यांचे का तुला मंजूर नाही ? 

वाहणे या आसवांचे का तुला मंजूर नाही ?? 

सोबतीला चंद्र नाही , रात्र आहे जीवघेणी ; 

जागणे हे चांदण्यांचे का तुला मंजूर नाही ? 

चांगली गंधाळलेली बाग आहे त्या फुलांची ; 

लाजणे छोट्या कळ्यांचे का तुला मंजूर नाही ? 

सोड आता , फार झाले ना बहाने टाळण्याचे ; 

भाळणे या आठवांचे का तुला मंजूर नाही ?? 

अंत झाला जीवनाचा मी जरी नाही जगी त्या ; 

भास माझे भासण्याचे का तुला मंजूर नाही ?? 

कविकुमार - 

(१८।२।१४)

-:( सार ):-

गजल 

तू काळजावर वार केले ! 

मी वेदनेचे हार केले !! 

तू कोँडलेले श्वास माझे ; 

मी भावनेला दार केले !! 

तू आखलेली बंधने पण ; 

मी अंतरांना पार केले !! 

तू तोडले माझ्यामनाला ; 

मी टाचले , तैयार केले !! 

मी वाचले कित्येक दोहे ; 

ह्या जीवनाचे सार केले !! 

कविकुमार - 

(१७।२।१४)

-:( हिशोब दे ):-

जाते आहेस सोडून मजला 

खुशाल जा , पण हिशोब दे ! 

नात्यासाठी साठवलेल्या 

स्वप्नांचा तू हिशोब दे ! 

चंद्रालाही सांगत होतो 

तुझी नी प्रित अशी 

तुझ्याचसाठी जागवलेल्या 

राञींचा तू हिशोब दे ! 

वेचत होतो फुले मी जेव्हा 

बाग सकाळी जागत होती 

हृदयाभोवती मोहरलेल्या 

गंधाचा तू हिशोब दे ! 

कशी अवेळी भेटत होती 

तुझी आठवण मजला 

तुझ्याचसाठी घालवलेल्या 

वेळेचा तू हिशोब दे !! 

डोळ्यांच्याही पापण्यांतली 

ओल कडेची दडवत होतो 

तुझ्याचसाठी ओघळलेल्या 

अश्रुंचा तू हिशोब दे !! 

कविकुमार - 

(१२।२।१४)